MCB ta lansa 2 buki
Awor e konsumidó tin dos fuente mas pa konsientisá su mes
Komo parti di Maduro & Curiel's Bank su responsabilidat síviko i konsiderá nan su papel komo konsehero, e ta lansa dos buki, 'Maneho di Plaka' i 'Bon Bista pa Hipotek'. E bukinan ta kubri e área di finansa personal i tambe e tereno interesante di hipotek.
Komo instituto finansiero bo ta hañabo regularmente ku e situashon kaminda un kliente, den su afan i deseo pa yega na sierto kosnan, por hinka su kurpa den problema finansiero ku tur e konsekuenshanan ferfelu ku esaki por trese kuné. Tin ora e persona mes ta kere ku e por paga, pero nos ta keda ku e obligashon di no duna e krédito si nos ta di opinion ku e persona, sea awor akí òf den un futuro serkano, lo haña su mes den problema. Pa yuda den e proseso aki, MCB ta orguyoso pa lansa e buki 'Manehá Bo Plaka' ku ta kubri ampliamente e diferente aspektonan di finansa personal. 'Maneho di Plaka' ta un aporte di nos banda pa yuda e kliente pa e ta mas konsiente di su situashon finansiero partikular i pa yud'é tuma e desishonnan apropiá. Nos ta spera ku e lo resultá útil pa e konsumidó.
Kompra òf konstrukshon di bo propio kas lo ta probablemente e invershon mas grandi ku bo ta hasi den henter bo bida. Bo kas ta e sentro di bo bida. Pesei ta importante pa bo ta bon informá ora bo ta hasi e invershon aki. Pa duna e kliente un man den e desishon importante aki nos ta introdusí e buki 'Bon Bista pa Hipotek' ku ta e promé buki na papiamentu riba e tópiko interesante akí. Na momentu di atkirí bo mes kas masha hopi aspekto ta bin dilanti manera presupuesto, estilo di bida, lugá kaminda e kas ta situá, ki tipo di hipotek, seguro, kosto di notario, taksadó etc. Ku yudansa di Departamento di Fiansa Personal i Hipotek di MCB i e buki 'Bon Bista pa Hipotek', ku ademas di trata kon ta haña un hipotek, ta splika tambe e vários trámitenan relashoná ku kompra di un kas. Nos ta orguyoso di por fasilitá e konsumidó ku un guia pa pasa den e proseso interesante akí.
E dos bukinan aki ta parti di e tradishon largu di Bo Banko Amigu, manera e buki di Kompa Leon kon pa atendé ku debe, kursonan den bario tokante kon ta presupuestá, nos foyetonan práktiko tokante tópikonan legal, kursonan di empresa chikí i publikashonnan tokante seguridat personal.
'Manehá Bo Plaka' i 'Bon Bista pa Hipotek' ta optenibel grátis na tur filial di Maduro & Curiel's Bank, na Fundashon pa Konsumidó i tambe na Departamento di Fiansa Personal i Hipotek di MCB den nos edifisio na Saliña.
Pa mas informashon por tuma kontakto ku Departamento di Fiansa Personal i Hipotek di MCB na telefòn 4661817.
